Google+ Followers

Tuesday, July 12, 2016


இன்னம்பூரான் பக்கம் நான் ஆண்டவனின் திருவோடு

இன்னம்பூரான் பக்கம்
நான் ஆண்டவனின் திருவோடு
இன்னம்பூரான்
ஜூலை 12 , 2016


இந்த படத்தை கண்டவுடன், எனக்கு என்னமோ மஹாத்மா காந்தி தான் பொக்கைவாய் சிரிப்புடன் வந்து நிற்கிறார். தென்னாப்பரிக்காவில் அவர் ஒரு அமைதியான கிளர்ச்சியை துவக்கி வைக்கிறார், அரசு இந்திய திருமணங்கள் செல்லாது என்ற விதியை நிர்ணயித்த போது. அது தான் உலக வரலாற்றில் முதல் அமைதி புரட்சி எனலாம். ஒருவர், இருவர் என புறப்பட்ட ஊர்வலம், குஞ்சும் குளவானும், படி தாண்டா பத்தினிகளும், ஆயிரக்கணக்கில் புடை சூழ, களை கட்டி விட்டது. தாட்பூட் தஞ்சாவூர் என்று பயமுறுத்திய அரசு கையை பிசைந்து கொண்டு அப்பாவியாக நிற்கிறது. அந்த காலகட்டத்தில் ரயில்வே ஹர்த்தால் அறிவிக்கப்படுகிறது. ‘உங்களுக்கு அதனால் வேலை அதிகம். உங்களுக்கு உதவியாக என் போராட்டத்தை தற்காலிகமாக நிறுத்திக்கொள்கிறேன்’ என்று அரசுக்கு அவர் எழுத, அதிபர் ஜெனெரல் ஸ்மட்ஸின் காரியதரிசி, ‘உங்களை என்ன செய்வது என்று தெரியாமல் தவிக்கிறோம்.’ என்று நன்றி கூறுகிறார். முழு விவரமும் ‘அன்றொரு நாள்’ தொடரில் எழுதியிருக்கிறேன். ரோஸா பார்க் அவர்களும், மார்டின் லூதர் கிங்கும் அவ்வாறே பவனி வந்தார்கள்.  யாராவது கேட்டால் மீள்பதிவு செய்யலாம். இது நிற்க.

சில சித்திரங்கள் வரலாற்றின் மையக்கருவான வினாடியை கையகப்படுத்தி, அதை நிரந்தர பதிகமாக பதிந்து விடுகின்றன.
ஆழ்ந்து கவனித்தால், அவை இயல்பாகவே அமைந்தவையாக இருக்கும். காந்திஜி உப்பு அள்ளுவதும், டியான்மென் சதுக்கத்தில் டாங்கி முன் சமாதான புறாவாக நின்ற மனிதனும், வியாட்நாம் போரில் விஷவாயு வெடியால் பற்றிய தீயுடன் ஓடி வந்த பெண்குழந்தையும், நாஜி கொடுமைகளும், போரிலிருந்து திரும்பிய ராணுவவீரன் டைம்ஸ் சதுக்கத்தில் ஒரு பெண்ணை கட்டி முத்தமிடுவதும், ஜான் கென்னடியின் சவப்பெட்டிக்கு சலாம் அடிக்கும் சிறுவன் ஜான் ஜானின் படமும், சென்னை வெள்ளத்தில் மனிதாபிமானத்துடன் பணி செய்த சில ஆர்வலர்களின் மனிதநேயப்படங்களும், மற்றும் பலவும் எண்ணில் அடங்கா. சிந்தியா காக்ஸ் உபால்டோ இந்த படத்தையும் அந்த வரிசையில் சேர்கிறார்.

இந்தியாவில் இன்றளவும் தீண்டாமை ஒழிக்கப்படாத காலகட்டத்தில், இரண்டு நூற்றாண்டுகளுக்கு முன்னால் அடிமைகளாக நடத்தப்பட்ட ஆஃப்ரோ அமெரிக்கர்கள் மிகவும் முன்னேறியுள்ளார்கள். ஜனாதிபதியே அந்த பின்னணியை சார்ந்தவர். எனினும், இன்று கூட அந்த இனத்தினரை போலீசார் கடுமையாக தண்டிக்கும் நிகழ்வுகள் லாஸ் ஏஞ்சலஸ், சைண்ட் லூயிஸ், பேடன் ரூஷ் போன்ற இடங்களில் நடந்துள்ளன. அவர்களில் சிலர் சுட்டுத்தள்ளப்பட்டனர். அல்டன் ஸ்டெர்லிங் என்பவர் ஜூலை 9 2016 அன்று அவ்வாறு
சுடப்பட்டு இறந்தார்.  

அதை கண்டிக்கும் வகையில் நேற்று நடந்த கிளர்ச்சியில் பங்கு கொண்ட ஒரு இளம்பெண்ணின் படம் இது. ஏதோ ராக்ஷஸர்கள் போல் பலவிதமான பயங்கரமான தளவாடங்கள் அணிந்த போலீஸ் இருவர் இந்த பெண்ணை கைது செய்ய வருகிறார்கள். மயில் ராவணன் தோற்றான். அத்தனை ஜோடனை. பின்னால் ஒரு அசுர படையே நிற்கிறது.
சுற்றி வர சூறாவளி அடிக்க, சாந்தஸ்வரூபிணியாக அதன் மையத்தில் தனது மெல்லிய ஆடை காற்றில் அசைய, முகத்தில் அகத்தின் அமைதி நிலவ, நிற்கிறாள் இந்த பெண். அவள் பெயர்  இஷியா ஈவான்ஸ். ஜோனாதன் பக்ஹ்மன் எடுத்த இந்த நிழற்படம் உலகம் முழுதும் சுற்றி விட்டது. திருமதி ஈவான்ஸ், ‘எல்லாருக்கும் நன்றி. இது இறைவனின் செயல். நான் இறைவனின் திருவோடு மட்டும் தான்' என்று அடக்கத்துடன் கூறுகிறார்.
-#-
சித்திரத்துக்கு நன்றி

படித்தது: உலகாளவிய நாளிதழ்கள்.

இன்னம்பூரான்

http://innamburan.blogspot.co.uk

http://innamburan.blogspot.de/view/magazine

www.olitamizh.com

Sunday, July 10, 2016

இன்னம்பூரான் பக்கம் 7 நூற வருடங்களுக்கு முன்னால் 3



 

இன்னம்பூரான் பக்கம் 7
நூற வருடங்களுக்கு முன்னால் 3

பிரசுரம்: http://www.vallamai.com/?p=70225
இன்னம்பூரான்
ஜூலை 8, 2016

மனிதவியலும் சமூகவியலும் தவிர்த்த மருத்துவம் உதவாக்கரை. தக்கதொரு மருத்துவ நல்வரவுகள் இல்லாத சமூகம் பாழ். ஏழை பாழைகளுக்கும், செல்வந்தர்களுக்கும் கிடைக்கும் மருத்துவ சிகிச்சை/உதவி/ஆலோசனை எல்லாம் ஒரே தரத்தில் இருப்பது தான் நியாயம். காசுக்கேற்ப வசதி கிடைப்பது நடைமுறைதான். காசு கொடுத்தால் தான் வைத்தியம் என்பது அடாவடி. அண்மையில் மதுரை ராஜாஜி மருத்துவமனையில், லஞ்சம் கொடுக்க முடியாததால், ஒரு சாவு. தற்காலம் இந்தியாவில் தனியார் மருத்துவமனைகள் பெருகி இருப்பதும், அரசு தர்ம ஆஸ்பத்திரிகள் முடங்கி இருப்பதும் கண்கூடு. எனினும், அரசு மருத்துவமனைகளுக்கு அடிக்கடி செல்லும் நான், ஆங்காங்கே நல்ல முன்னேற்றங்களைக் காண்கிறேன்.

சென்னை மருத்துவ மனை துவக்கப்பட்டது நவம்பர் 16, 1664. ராணுவ மருத்துவமனையான அதில் இந்திய நோயாளிகள் அனுமதிக்கப்பட்டது 1842ல் தான். 1964ல், அதாவது, துவக்கி முன்னூறு ஆண்டுகள் கழிந்த பின்னும், அங்கு இலவசமருத்துவமும், தரமான சிகிச்சையும், மனித நேயம் குறையாத அணுகுமுறையும் காணக்கிடைத்தன. என் தந்தைக்கு 1964ல் சிக்கலான ஒரு நரம்பியல் அறுவை சிகிச்சை நடந்தது. மருத்துவர், இங்கிலாந்திலிருந்து வந்திருந்த ஒரு மருத்துவ பேராசிரியர். அறுவை சிகிச்சைக் கட்டணம் ரூபாய் 15/-, தந்தையின் வரும்படி அடிப்படையில். ஏழைக்கு இலவசம்.

அமெரிக்காவில் நூறாண்டுகளுக்கு முன் வைத்திய நடைமுறையை பற்றி ஜூலை 8, 1916 அன்று ஒரு கட்டுரை ‘ஜாமா’ (Journal of American Medical Association) என்ற பிரபல மருத்துவ இதழ் பிரசுரம் செய்தது. அதுவும் நான் அடிக்கடி பார்வையிட நேர்ந்த சைண்ட் லூயிஸ் நகரத்து வாஷிங்டன் பல்கலை கழகத்தின் மருத்துவமனை மருத்துவர்கள் எழுதியது.

நமது முன்னேற்றங்களைப் பாராட்டும் பொழுது குறைகளை கண்டறிந்து அவற்றை நீக்குவது தான் நல்லது. நாம் தேவையான சமாச்சாரங்களை ஆய்வு செய்து, தெளிவான முடிவுகளை நிறைவேற்றுவது அரிது. உதாரணமாக, 1970-2010 காலகட்டத்தில் தருமமிகு சென்னை மருத்துவமனைகளில் அதருமம் தலையெடுத்ததைப் பற்றி ஒரு ஆய்வும் கிடைக்கவில்லை. ஆனால் நூறு வருடங்கள் முன்னால் ‘ஜாமா: ஜூலை 8, 1916’ இதழில் ஏழை பாழைகளும் ஆஃப்ரோ அமெரிக்கர்களும் நிறைந்த பகுதியிலிருந்து மத்தியதர மக்கள் வாழும் இடத்திற்கு மூன்று மருத்துவ ஆலோசனை மன்றங்கள், ஒன்றாக இணைக்கப்பட்டு, மாற்றப்பட்டதின் விளைவை சாங்கோபாங்கமாக ஆராய்ச்சி செய்திருக்கிறார்கள். ஏனெனில் மருத்துவ ஆலோசனை பழைய இடத்தில் இலவசமாகவே அமைந்தது நியாயமே. புது இடத்தில், வருமானத்தின் அடிப்படையில் ஆலோசனை அமைவதும் நியாயமே. அவர்கள் பல மாநிலங்களிடமிருந்து நடைமுறை விசாரித்தார்கள். அதில் க்ளீவ்லாந்து பதில், ‘எனக்கு மருத்துவம் சம்பந்தமில்லாத விசாரணைகளுக்கு நேரமும் கிடையாது; உண்மையும் வராது. அதனால் பிரயோஜனமில்லை.’ சிந்திக்கவைக்கிறது.

சென்னையில் போனவருடம் அரசு ஆஸ்பத்திரி ஒன்றுக்கு சென்றிருந்தேன். குமாஸ்தா வருமானம் எவ்வளவு என்று கேட்டார். என் ஓய்வூதியம் சொன்னவுடன், சிரித்துக்கொண்டே குறித்துக்கொண்டார். பின்னர் அந்த எழுத்தை படிக்கமுடியவில்லை. இலவசமாக தான் ஆலோசனை அளித்தார்கள். அவரிடம் விளக்கம் கேட்டபோது, அங்கு ஆலோசனை இலவசம். சிகிச்சைக்குத்தான் வருமான அடிப்படை. அப்போது பார்த்துக்கொள்ளலாம் என்று, உங்கள் வசதிக்காக கிறுக்கி வைத்தேன் என்று ஒரு போடு போட்டார்.
-#-

சித்திரத்துக்கு நன்றி:
https://wuphysicians.wustl.edu/Portals/0/Skins/wash-u-physicians/images/wash-u-physicians-logo.png

படித்தது:
https://jama.jamanetwork.com/issue.aspx?journalid=67&issueid=10559



இன்னம்பூரான்

http://innamburan.blogspot.co.uk

http://innamburan.blogspot.de/view/magazine

www.olitamizh.com
__._,_.___

Posted by: "Innamburan S.Soundararajan" <innamburan@gmail.com
Reply via web postReply to sender Reply to group Start a new topicMessages in this topic (1)
This Group is restricted to Invitees only for ensuring compliance with the Terms, Guidelines & Privacy conditions of Yahoo and this Group and to guard against phishing. Most members of this Group are from an Elder Community in Aalapaakkam.
Respecting their wishes, all may refrain from commenting upon the community and its administrations.
Yahoo! Groups
• Privacy • Unsubscribe • Terms of Use
.

__,_._,___